Thailand : Puka tangte lakchhuah kim an ni ta

Thailand-a Tham Luang puka tangte chhanchhuah hna chu nimin khan a ni thumna atan thawh chhunzawm leh nghal niin, nimin tlai khan an vaiin him taka lakchhuah kim an ni ta.

June 23 aṭanga Myanmar ramri bul, Chiang Rai province-a Tham Luang puk-a tang, Wild Boars soccer team-a rawlthar 12 leh an coach te lakchhuah hna hi Pathianni aṭang khan ṭhawh ṭan a ni. Tuilut thiam rualten chhanchhuah hna hi thawkin, Pathianni khan rawlthar pali lakchhuah an ni. A kawngte a hautak avangin oxygen tank-te chhawpna turin hun eng emaw chen an chawl lailawk a, Thawhṭanni chawhma dar 11 aṭangin an thawk chhunzawm leh a, darkar kua chhungin midang pali lakchhuah belh leh a ni a, hemi hnu hian an chawl leh lailawk a ni.

Nimin chawhma dar 10 aṭang khan chhanchhuah hna hi thawh chhunzawm leh a ni. Thawhṭanni tlai aṭang nimin zing thleng khan ruah a sur chhunzawm leh a, mahse ruahsur hian puk chhunga tui level a tihsan phah loh avangin an hnathawh a tibahlah lo niin official-te chuan an sawi.

Mi pariat lakchhuah an nih hnuah Thawhlehni khan pukah hian rawlthar pali leh an coach te an la awm a, anni bakah an tanna hmuna hmuhchhuah an nih aṭanga awmpuitu Navy Seals pathum leh doctor pakhat an awm bawk. Nimina a thawh thumna atana chhanchhuah hna hi diver 19 in an thawk niin Chiang Rai Governor Narongsak Osotthanakorn chuan a sawi. Diver-te hian rawltharte hi lachhuak hmasain, a hnuhnung berah an coach hi lakchhuak a ni a, anmahni awmpuitute pawh him takin hruaichhuah an ni nghal bawk.

Thailand Prime Minister Prayuth Chan-ocha pawhin Thawhṭanni khan Chiang Rai Prachanookroh hospital-ah naupangte hi a tlawh a, nimin khan Tham Luang puka chhanchhuah hna thawh hi a hmunah kalin a enpui leh bawk. Hetiang vanduaina hi a thlen nawn tawh lohna tura inzirna atan an hman a ngai tih a sawi.

Puk aṭanga lakchhuahte hi Chiang Rai hospital-a isolation ward-ah enkawl nghal a ni. Pathianni-a lakchhuah mipalite hi Thawhṭanni zan khan darthlang chhanah an chhungte nen inhmuhtir an nih bakah phone-a inbiaktir an ni bawk. Health official-te chuan puk chhungah hun rei tak an tan avangin infection an nei em tih enfiah hmasak vek an nih hma chuan midangte nen inpawhtir ala rem lo tih an sawi. Laboratory test result te a ṭha a nih pawhin, heng naupangte hi an chhungte pawhin medical gown hain, hmai leh lu tuam chungin an hmu thei chauh hrih dawn a ni. Naupangte hi darkar 48 tal chu meter 2 aiin an hnaih rih tur a ni lo tiin an sawi. Naupangte hi damdawi-inah hian ni sarih tal enkawl phawt an ni ang.

Naupang lakchhuah tawh zinga pahnih chu pneumonia neiin, an taksa temperature pawh a hniam hle a, mahse uluk taka enkawl an nih hnuah hma an sawn zel niin an sawi. Official-te chuan naupangte hi an tan rei avangin pneumonia an rawn vei chhuah vek an ring tih an sawi a, mahse vanneihthlak takin a tam zawk chu he natna nei lo hian an awm a ni, an ti.

Public Health Ministry-a deputy director-general Jesada Chokdumrongsuk chuan naupangte hian ei tur sakhat chi pawh an ei thei tawh a, mahse a pai nuam chi pek an la ni rih niin a sawi. An zinga pahnihte chu dam ṭha vak lo mah se an vaiin hian an hlim hle niin a sawi. Chokdumrongsuk chuan heng rawlthar rualte hi footballer an nih vangin an immune system a sang a, hei hian nasa takin a pui a ni, a ti. Ei leh in tur mumal awm lo leh puk thim tak hnuaia hun rei an awm hnuah chaurau mai loa an an la awm thei chu thil lawmawm tak a nih thu a sawi. Mahse puka hun rei tak an tan hian an rilru lamah nghawng a nei em tih enfiah chhunzawm an ni dawn tih a sawi bawk.

Chhanchhuah hna thawktu, diver zinga mi Narongsuk Keasub chuan an hna thawh tawh zingah Tham Luang mission chu a hahthlak leh hautak ber a la nih thu a sawi. Keasub hi diver rual, tunnel-a SEAL team tana air tank lo pechhawngtu zingah a tel a, puk chhung hi a thim em avangin anmahni kut ngei pawh an hmu hlei thei lo tih a sawi. Hei bakah hian lungte chu a hriamin a kawng a zim a, a hlauhawm hle tih a sawi.