Ram 24-ah Omicron Covid-19 variant hmuchhuak tawh : WHO
Africa chhimlama November thlaa hmuhchhuah, Omicron Covid-19 variant chu ram 24-ah an hmuchhuak tawh tih World Health Organisation (WHO) director-general Tedros Adhanom Ghebreyesus chuan Nilaini khan a sawi.
WHO lam chuan tun aṭanga hun rei loteah Omicron variant nihphung leh inkaichhawn dan kimchang zawk an hriat theih tur thu Covid-19 lama an hotu Maria van Kerkhove chuan a sawi a ni.
Ghebreyesus chuan Omicron variant an hmuhchhuahna hmunte hi WHO region panga emaw paruk emaw aṭangin a nih thu leh an la hmuhchhuah belh zel a rinawn thu sawiin, "WHO chuan hri inthlak danglam dan hi kan ngaihven reng a, chutiang bawkin ram dangte pawhin an ngaihven tur a ni," a ti.
WHO hotu hian Omicron Covid-19 variant hmuhchhuah thar hi mak ti lo tur leh hri kalphung ve reng a nih thu sawiin, "Coronavirus pawh hi khuahkhirh loha kan tihdarh chhung chuan a inthlakdanglam reng dawn a ni," tiin a sawi.
"Omicron chungchangah thuthar hriat belh zel mah ila hri inkaichhawn chungchangte, a nat zawngte leh tests, therapeutics leh vaccines hnathawhdan zir tur tam tak a la awm a ni" tiin Ghebreyesus chuan press briefing-ah a sawi a ni.
WHO-in he variant hmuhna ramte laka zin veivah khapna siam rih lo tura a duh thu pawh sawi nawn lehin, United Nations (UN) health agency chief chuan ramdangte chu international health regulations zawm chungin awmze nei tak leh midang tana chhiatna thlen thei zawnga hma la lo turin a ngen.
Ghebreyesus chuan airport an chhuahsan dawn emaw an luhin emaw passenger-te chu screening neihsak tur leh rampawn aṭanga khualzin rawn lutte inkhunghran tir zel chu Omicron variant inkaidarh tur venna atan a ṭhat zawk thu a sawi bawk.
Nilaini thlenga Omicron variant hmuh chhuah tawhna ramte chu - Botswana, South Africa, Nigeria, UK, South Korea, Australia, Austria, Belgium, Brazil, Czech Republic, France, Germany, Hong Kong, Israel, Italy, Japan, Netherlands, Norway, Spain, Portugal, Sweden, Canada, Denmark leh US-te an ni.