Pakistan PM-in minister-te rampawna zinchhuah khap

Pakistan prime minister Imran Khan chuan a cabinet minister-te chu phalna la loa rampawna zinchhuah khapin, amah pawh ramdangah zin a tum loh thu a sawi.

Nilainia PM hoa cabinet meeting neihah he thu hi sawiin, he meeting-ah hian National Assembly Member (MNA) Riaz Fatyana-a'n global climate summit hmanga Glasgow-a a zin ṭuma insual buainaa an inhnamhnawih chungchangte pawh an sawi a ni.

PM chuan rampawna a zinchhuah loh chhung chu a cabinet minister dangte pawh zinchhuak lo turin a ngen.

Hetih lai hian information minister Fawad Chaudhry chuan MNA leh senator te chu minister-te aia an zinchhuak tam zawk thu a sawi a, hei hi PM chuan chhangin MNA leh senator te pawh rampawna zinchhuak tawh lo turin a chah zui nghal. "Sorkar hna chu kan ngai pawimawh ber tur a ni," tiin Pakistan PM chuan a sawi.

Hetihlai hian Covid-19 Omicron strain laka invennan Pakistan chuan vaccine semchhuah dan thar tur tichhuakin, natna benvawn nei, healthcare worker leh kum 50 chin chunglamte hnenah booster dose pek chhuah a tum a ni.