Argentina President hlui enthlatua puhna thubuai siamsak

Argentina president hlui Mauricio Macri chu kum 2017-a navy submarine pila thi, sailor 44 chhungte enthlak tira puhin thubuai siamsak a ni.

He thubuaiah hian thiam loh chantir a nih chuan kum 3-10 chhung jail-ah tantir theih a ni ang.

Judge Martin Baa chuan President hlui, right-wing opposition leader ni mek hi dik lo taka a thuneihna hmang a, mimal data lakhawm leh hmangah puhin thubuai hi siamsak a nih thu a sawi.

An puhna chung­chang hi Macri chuan ziakin a chhang a, "Tumah ka enthla lo a, midang pawh enthla turin thu ka pe ngai bawk lo," tiin a sawi. Thubuai an siamsak chu politics lama amah tihchhiat tuma beihna niin a sawi a ni.

Judge chuan Macri hi pesos maktaduai 100 dahkhama bail-a chhuah a phalsak a, mahse Argentina ram chhuahsan lo turin a ti.