Delta aiin Omicron variant a let thumin kai nawn awlsam zawk

South Africa-a scientist-ten Omicron variant chungchang an zirchianna an tihchhuahah, Delta leh Beta strain aiin Omicron variant hi a let thumin kai nawn leh a awlsam zawk tih an sawi.

He zirchianna hi South Africa health system data lakkhawm aṭanga an siam a ni.

Report-ah hian November 27 thleng khan Covid positive tawh mi maktaduai 2.8 zingah hri kai nawn 35,670 an awm a ni. Positive an nih hriat aṭanga ni 90 hnua test-a positive lehte chu hri kai nawn angah hian chhiar an ni.

South African DSI-NRF Centre of Excellence in Epidemiological Modelling and Analysis director Juliet Pulliam chuan, hri leng thawh thumna len laia hri kai tawh zingah hri kai nawn leh tun hnaiah an tam chho hle tih a sawi a, heng zinga a tam zawk chu Delta variant len laia lo kai tawhte an ni, a ti. Hri kai nawn hmuh chhuahte hi vaccine an lak dan kimchang hriat tel a ni lo a, hei vang hian Omicron lakah vaccine-in hna a thawh dan hi hriat chian theih a ni lo, a ti. Researcher-te chuan hemi chungchangah hian zirchianna kalpui leh nghal an tum. "Omicron-in eng tiang chiahin nge nghawng aneih dan data rang takin kan mamawh a ni," a ti.

University of Southampton scientist Michael Head chuan he zirchianna hi fakin, "He zirchianna ṭanga a lan dan chuan a ngaihṭhat thlak loh hle a, hri laka min veng theitu chu awlsam takin a kalkan thei a ni," tiin a sawi.

Hemi hma hian National Institute for Communicable Disease-a expert, South African scientist Anne Von Gottberg chuan Omicron variant kai hi an pung chho nasa dawn niin a lo sawi lawk a, mahse thuneitu lam chuan he variant thar lakah hian vaccine-te chuan an ven theih an la beisei a ni.

Omicron variant hi ram hrang hrangah a darh chho mek a, hetih lai hian a nihphung dik tak hi hriatchian tak a la nih loh avangin ram ṭhenkhatin South Africa leh a ṭhenawm ramte laka zin veivah khapna an siam chu World Health Organisation (WHO) chuan sawiselin, heng khapna siam ramte hi ngaihtuah ṭha leh turin a ngen.