Yangon-a nawrh huaihawtte ralthuam nen sipaite'n an bei : HRW

Human Rights Watch (HRW) chuan Ningani khan report tichhuakin, Myanmar sipaite chuan kumin March 14 khan Yangon khawpuia nawrh huaihawtte chu ralthuam nena beiin, mi 65 an kaphlum tih a sawi.

He report hi hemi nia thil thleng mita hmutu mi parukte an kawmna leh, social media lama video 13 leh thlalak 31 thehdarh an hmuh aṭang an siam a nih thu an sawi. Video an enfiah zingah hian police officer pakhatin TikTok video a dah, security official-ten eng ang ralthuam nge an hman dawn tih an sawiho laite pawh a tel.

March 14 khan Yangon-a Hlaing River Road-a nawrh huaihawtte chu security-te hian an bei a ni. Video pahnih leh satellite image aṭanga a lan danin sipaite hian mipui awmkhawmte hi hualin, tear gas leh rubber bullet-a an kah hnuah, silai mu takin an kap zui niin HRW report chuan a sawi. Mipuite tlanchhiatna tur kawngte chu dangin, pungkawmte hi an bei a, hliam tuar ṭanpui tum healthcare worker-te pawh an bei tel bawk.

February 1-a sipaiten civil sorkar thuneihna an hnehchhuh avanga Myanmar rama tualchhung buaina hrang hrang thlengah, sipai rorelna duh lohna lantirtu zinga 1,300 chuang chu sipaite kut tuarin an thi tawh tih Assistance Association for Political Prisoners (AAPP) chuan a sawi bawk a ni.