Puka tangte lakchhuah fel hnuah tui pump-na pui ber a chhia

Thailand-a Tham Luang puk-a tang, Wild Boars football team ami rawlthar 12 leh an coach-te chu karhnih chuang puk chhunga an tan hnuah Thawhlehni tlai khan an vaiin him taka lakchhuah an ni ta. Puka tangte lakchhuah fel an nih hnu lawkah puk chhunga tui paihchhuahna pui ber chu a chhia a, hetihlai hian puk chhung km 1.5 vela thukah diver leh rescue team-te hi an la awm a, mahse him takin an chhuak hman a ni.

Mi 13 te tanna Tham Luang puk chhung hi tuilianin a chim nasat avang te, a tanna hmun hi a thui tham vang leh a chhuahna kawng hi khawkrawk tak tak leh hlauhawm tak tak a nih avangin chhanchhuah hna pawhi hi a hautak hle. Chhanchhuah hna hi Thai Navy Seals in a thawk a, he hna hi a hautak avangin 'Thailand mission impossible' tiin an vuah hial.

Rawlthar leh an coach tangte hi tuiluh an thiam loh avangin diver pahnihin mi pakhat hi an chhawm chhuak a, a thui tham avangin kawng lakah oxygen tank te chhawp a ni. Puk chhung hi tuilianin a chim avangin a tirah chuan hruaichhuah nan hian fur zawh hun, August/September thla nghah tum a ni. Mahse ruah a sur chhunzawm zel avang leh, puka tui tling sang zel hian an tawmna hmun a chim mai a hlauhawm tak avangin Pathianni aṭang khan hruaichhuah hna hi thawh a ni ta a ni.

Pathianni khan rawlthar pali hruaichhuah an ni a, kawng lakah an hman tur oxygen tank te dahkhah leh a ngaih vangin chawlh lailawk a ni a, Thawhṭanni-ah chhunzawm lehin hemi ni hian mi pali bawk hruaichhuah leh an ni. Hun eng emaw chen an chawl a, Nilaini khan a ni thumna atan thawk lehin, puka la awm rawlthar pali leh an coach chu lakchhuah an ni leh a ni.

Puk chhunga tangte hi an awmna hmun hmuhchhuah a nih hnu hian Thailand Navy Seals pathum leh doctor pakhatin an awmpui nghal a, Nilaini pawh hian football team member leh an coach te lakchhuah fel an nih hnuah an chhuak ve chauh a ni.

Puka tangte lakchhuah fel a nih hnu, rescue team-ten puk chhunga an hmanrua chhawpte senghawi an tum laiin tui pump chhuahna pui ber hi chhiain, tui hi a nasa takin a lut zui a ni. Rescue team te pawh an bungrua tam tak seng khawm hman loin an tlanchhuahsan a, air tank eng emaw zat an kalsan a ni. Hengte hi Navy Seals ta leh, Thailand lal-in chhanchhuah hna thawhna atana a thawhte an ni.

Wild Boars football team leh an coach-te hi damdawi-inah uluk taka enkawl nghal niin, an taksa te pawh enfiah sak an ni a, an ngaihtuahawm lo nia sawi a ni. Mahse an chhungte leh midangte nen an inpawh phalsak an la ni lo a, darthalang phenah erawh inhmuhtir an ni. Damdawi-inah hian hun eng emaw chen enkawl chhunzawm an a ngai dawn a ni.

FIFA President Gianni Infantino chuan Wild Boars football team-te hi kar hmasa khan puk aṭanga lakchhuah an nih hman chuan Pathianni zana FIFA World Cup final, Moscow-a neih tura a hmun ngeia en turin alo sawm tawh a, mahse damdawi-inah enkawl chhunzawm an la ngaih dawn avangin Moscow-ah hian an kal thei dawn ta lo a ni. FIFA thupuangtu chuan an hriselna dinhmun avangin football team hian Moscow hi an kal thei dawn lo tih hriattir an ni tih sawiin, hriselna ṭha an neih chu an ngaih pawimawh sak ber tih a sawi a, hemi rual hian FIFA event dangah heng team-te sawmna hun remchang dang an la ngaithuah dawn tih a sawi. Hemi rual hian puka tangte chhanchhuah hna thawhna kawnga a nunna chan ta, Thai Navy Seal hlui chu an hriatreng thu leh, a chhungte an tawrhpui thu a tarlang bawk.