Israel-in Gaza bungraw lakluhna khar

Israel chuan Palestinian miten an ram an halsak leh ramri paltlanga luh luih an tum chhan let nan, Gaza Strip ramri kaltlanga bungrua lakluhna pui ber, Kerem Shalam a dan sak. He kawngah hian damdawi leh chaw lam chi chauh lakluh a phalsak dawn.

Israel Prime Minister Benjamin Netanyahu chuan Gaza-a roreltu, Palestinian pawl Hamas te chu na taka beih let a tiam.

Hetih lai hian Hamas thupuangtu chuan Israel thiltih dan chu mihring chunga pawikhawihna lian tak a ni tiin a sawi.

Palestinian-te hian lehkhachaih leh balloon halin Israel ram chinah an chhuah ṭhin a, hei hian kangmei a thlen fo a ni. Hetianga an thiltih vang hian Israel chhim lamah ṭum 750 zet kangmei a chhuak tawh a, ram hectare 2,600 chuang zeta zau a kangchhe tawh niin Israel official-te chuan an sawi.

Palestinian-te hian Israel-in an ram a luahsakte chu a neitu dik takte hnena pek kir leh phutin Gaza leh Israel ramri bulah hun rei tak nawrh an huaihawt tawh a, hei bakah hian Israel leh Egypt-in Gaza luhna kawng an dansakte tihtawp turin an phut bawk. Ramri-a nawrh huaihawt leh Israel sipaite inkara buaina chhuak vangin mi 130 chuang an thi tawh a, midang 15,000 velin hliam an tuar bawk niin Gaza health official-te chuan an tarlang.

Human rights group hrang hrangte chuan nawrh huaihawtte chunga Israel sipaite chet dan chu an sawisel a, Palestinian mite tana zalenna beitu, Israel NGO Gisha pawhin Israel sorkar thutlukna siam hi a sawisel a, Palestinian-te thiltih avanga Israel-a thlai chinna ram zau tak tihchhiat a ni chu an dem hle tih an sawi rualin he thil avanga Gaza-a cheng mi maktaduai hnih dawn hrem an nih phah chu ṭha a ti lo tih a sawi. Gaza tana bungraw pawimawhte hi Kherem Shalom kaltlanga lakluh vek an ni.

United Nations chuan kum kumtir lam thla nga chhungin Kerem Shalom kaltlang hian bungrua, motor liana phurh, load 43,087 lakluh a nih thu a sawi. Heng zinga 44% chu in sakna hmanrua niin, chaw lam chi 29% leh damdawi 1% an tel bawk.