Pakistan poll rally neihnaa bomb puakah mi 13 an thi

Pakistan inthlanpui neih tur atan election rally neihna hmunah Thawhlehni khan thihchilh bomb a puak a, mi 13 an thi. Thi zingah Awami National Party (ANP) hruaitu Haroon Bilour pawh a tel.

Thih chilh bomb tihpuahna hi Pakistan hmar thlang lam, Peshawar khuaa rally neihna hmunah a ni. Bilour leh ANP worker-te corner meeting nei tura an awmna hmunah bomb hi tihpuah a ni a, mi 13 an thih bakah midang 47 in hliam an tuar a ni. Hliam tuarte hi Lady Reading Hospital-ah hruai nghal an ni. Bomb puaka thi zinga mi, Bilour hi Pashawar khuaa PK 78 constituency-a ANP candidate a ni.

Bomb disposal squad hotu Shafqat Malik chuan bomb tihpuahna atan hian TNT explosive kg riat zet hman a ni tih a sawi. Hei hi July 25-a inthlanpui neih tur puala election rally neihnaa bomb tihpuah a nih ṭum hnihna a ni. Tun thla tir lam khan KPK province-a Takhtikhel bula rally neihnaah bomb tihpuah a lo ni tawh a, mi pasarihin hliam na tak an tuar a ni.