Japan tuilian vanga thi 176 an tling tawh

Japan rama ruahsur nasa avanga tuilian leh leimina thi chu mi 176 an tling tawh a, Prime Minister Shinzo Abe chuan nimin khan tuilian vanga chhiatna thlen nasatna bial a tlawh.

Chief Cabinet Secretary Yoshihide chuan PM Abe hian nimin khah tuilian vanga mi 40 chuang thihna thlenna, Kurshiki-a evacuation centre a tlawh tih a sawi. Ruahsur nasa vanga chhiatna thleng ṭhin tam zawk hi Hiroshima leh a chhehvel biala thleng a ni. PM hian an rama chhiatna thleng vang hian Europe leh Middle East-a a zin tur pawh a ṭhulh phah a ni.

Tuilian leh leimin tuarte chhanchhuah hna hi ngawrh taka thawh chhunzawm zel niin, chin hriat loha awm mi tam tak te zawn mek an ni. Sorkar chuan chhanchhuah hna thawk tur hian sipai leh emegency worker 75,000 a tir a, helicopter 80 hman a ni bawk.

Chhungkaw tam tak chu electric supply nei lo leh, tui thianghlim in tur nei loin an awm mek a, heng mite chhawmdawl hna hi thawk mek niin, sorkar chuan harsatna tawk chhungkua leh evacuation centre-a awm mekte mamawh pekna atan hian dollar maktaduai 18 a seng tawh a ni.