Biden leh Putin-te'n Ukraine chungchang sawidun dawn

U.S. president Joe Biden leh Russia president Vladimir Putin-te chu naktuk hian video kaltlangin an inbe dawn a, Ukraine chungchang an sawidun ang.

White House thupuangtu Jen Psaki chuam ram pahnih hruaitute inbiak tur chungchang hi sawiin, "Biden chuan Ukraine nena an inrinaa Russia sipaite hmalakdan chungchanga US ngaihṭhat lohna leh, Ukraine ram thuneihna leh inrelbawlnate a thlawpzia pawh a sawilang leh dawn a ni," a ti.

Psaki chuan Biden leh Putin hian ram pahnihte thawhdunna leh inlaichinna chungchangte an sawidun dawn bawk a, June thlaa Geneva summit-a inremna an lo siam tawh a taka kalpui a nih dante pawh an sawi tur zingah hian a tel tih a tarlang.

Russia sorkar thupuangtu, Dmitry Peskov pawhin US leh Russia President-ten inbiakna an neih tur thu hi a puang ve bawk a, "Ram pahnih thawhdunna, Ukraine leh Geneva-a inremna a taka chantirte chu an sawi dun tur zingah a tel a ni," a ti.

Tun hnaia Ukraine ramri-ah Russia hian sipai 94,000 chuang a dah mek nia sawi a ni. Ukraine defense minister Oleksii Reznikov chuan kar liamta Zirtawpni khan intelligence report aṭanga an thudawn danin Russia chuan January thla tawp lam hian sipai leh ralthuam nen an ram lakah beihpui thlak an tum tih an dawn thu a sawi.

US president chuan Russia-in Ukraine a beih tur dang turin a adviser-te nen hmalak dan tur an ruahman mek tih a sawi. Hma an lak tum dan kimchang hi sawi lang lo mah se, US hian Europe lama a thurualpuite chu Russia laka hrekna na zawk lekkawh dan tur a sawipui tawh a ni.

Hun rei tak chhung chu US leh Russia inkarah hian inhmuhthiam lohna a thleng fo tawh a, kum 2014-a Russia-in Ukraine aṭanga Crimea an luahsak ṭum te, kum 2015-a Syria chungchanga an inrawlhna leh kum 2016-a President hlui Donald Trump-an thlan tlin a nih ṭuma US inthlana inrawlah Russia puh a nih avangte in ram pahnihte inkar boruak hi a ṭha lo hle.