US-in Taliban-te an intiamna zawm turin phut

US leh a thurualpui ram dangte chuan Afghanistan-a rorellai, Taliban-te chu Afghan security force member hlui vau a, an tihhlum ṭhin titawp turin an phut.

Ram 22-ten thuchhuah inṭawm an siamah, Taliban-te chu thuneihna an chan tira sorkar hmasa hnuaia thawktu leh sipaite tina lo tura an lo intiam tawhna chu zawm turin an phut tih an sawi. Tun hnaia Afghan security force hlui bo leh tihhlum an awm fo chu pawi an ti hle tih an sawi bawk. Thuchhuah siamtu zingah hian US bakah EU, UK, Australia, Canada, France, Germany, Japan leh Ukraine-te pawh an tel.

Human Right Watch chuan kar liam taa report a tihchhuahah, Taliban-ten Afghanistan-a thla li vel thuneihna an chan hnuah sorkar official hlui leh sipai 100 chuang rukbo leh tihhlum an awm niin a tarlang a ni. August 15 - October 31 chhung khan Taliban-te hian Afghan security force member 47 an that hman a ni, a ti.

Ram hrang hrangte chuan Taliban-te chet dan chu thlithlaiin, tehna atan an la hmang zel dawn tih an sawi. August thla aṭang khan Taliban-te hian thuneihna chelh tawh mah se, Taliban kaihhruai sorkar hi eng ram mahin an la pawmpui lo.

Hetih lai hian Taliban chuan security force member hluite bei ṭhin nia puhna hi a pha fo thung a, November thla khan anmahni zinga mi dik lo taka che ṭhinte dap chhuak turin commision pawh an din thu an lo sawi tawh a ni.