Indonesia rama tlang kangah mi 13 an thi

Indonesia rama Mount Semeru aṭanga tlang kang nasa tak invawrh chhuah thut vangin a bul hnai khuaa cheng mi 13 an thi tih disaster official-te chuan nimin khan an sawi.

Inrinni khan Java island-a tlang sang ber, Semeru tlang aṭang hian tlang kang hi rawn invawrh chhuakin, a bul hnaia khaw 11 te chuan tlang aṭanga vut sa invawrh chhuak hian a khuh a, mi tam tak chu himna zawngin an tlanchhia a ni.

National disaster mitigation agency (BNPB) thupuangtu Abdul Muhari chuan mi 13 ruang hmuh a nih tawh tih sawiin, an zinga pahnih chu tunge an nih hriat an ni tawh tih a sawi. Mi dang 57-te pawh an taksa kangin hliam na tak an tuar a, damdawi-inah dah an ni. Tlang kanna bul khuaa chengte hi lakchhuah hna thawh nghal ni mah se, nimin khan vut sa a la inphuh chhuah chhunzawm vangin hna thawh pawh chawlhsan lailawk a ni.

Semeru hi meter 3,600 chuang (feet 12,000)-a sang niin, Indonesia rama tlang kang inphuh chhuah ngunna zinga mi a ni. January thla pawh khan tlang kang hi a rawn inphuh chhuak tawh bawk.