Thailand football team-te video tichhuak

Thailand-a Tham Luang Nang Non puk aṭanga chhanchhuah, Wild Boars football team mi 12 leh an coach-te chu damdawi inah enkawl mek an ni a, damdawi in an awm lai video hi Nilaini khan tihchhuah a ni a, en a hlawh hle.

Rawlthar 12 leh an coach-te hi ni 17 zet puka an tan hnuah Thawhlehni khan him taka lakchhuah kim an ni. Puk chhunga hun rei tak an tan avangin an taksa rihnate pawh a tlahniam hman hlawm hle a, kg hnih velin an rihna hi a tlahniam hman vek a ni. Mahse video tihchhuahah hian hlim taka nuiin an ban te an rawn vai a ni. Video-ah hian naupang ṭhenkhat chu khumah muin a

ṭhen an ṭhu a, surgical mask an la vuah bawk

Chhanchhuah hna thawktu, Thai Navy Seals chuan Nilaini khan chhanchhuah hna thawh dan footage pawh an tichhuak bawk. He footage-ah hian puka tangte lakchhuahna tura tuilut thiam bikten an hman, puk chhunga pulley, hrui leh rubber piping eng emaw zat pawh a lang a ni.

Recue mission hotu Narongsak Osottanakorn chuan news conference-ah rawlthar rualte puk chhunga an bo chungchangah tumah dem leh mawhpuh tur an awm lo tih a sawi. "Naupang mai an la ni a, vanduaina an tawk palh a ni", a ti.

Puk aṭanga lakchhuah an nih hnuah helicopter hmangin Chiang Rai hospital-ah hruai nghal an ni a, midang tlawhpawh theih loha la dah an ni. Hospital director Chaiwetch Thanapaisal chuan ni 10 vel damdawi inah hian enkawl chhunzawm an la ni dawn tih a sawi a, hemi hnuah pawh ngai awh tur chuan in lamah ni 30 chhung tal enkawl chhunzawm an la ngai dawn niin a sawi.

Naupang pariatte chu an chhungte nen inhmuhtir an ni tawh a, mahse hetichung pawh hian an vaiin protective suit haktir an nih vek bakah meter 2 aia hnaia inhnaih phalsak an la ni lo. Health deparment inspector Thongchai Lertwilairattanapong chuan an zinga pakhat hian lung infection a nei tih a sawi a, an vai hian rabies leh tetanus vaccine pek nghal vek an ni tih a sawi bawk.

Prime Minister Pyayuth Chan-ocha chuan rawlthar leh an coach-te chu ngai an awh leh thuai theihna tur hun pe turin reporter-te a ngen. "Hemi atana pawimawh ber chu hun thawl pek an ni. Chim buai loh a, an hmasawn zel dan pawn lam aṭanga lo zirchian chu an tana ṭha ber tur a ni", a ti. PM chuan rawltharte hi puk aṭanga lakchhuah an nih dawn hian an chiai buai lohna turin anti-anxiety drug pek an nih thu a sawi.

Thai Navy Seal commander Rear Admiral Apakorn Yuukongkaew chuan chhanchhuah hna thawhna kawnga ram hrang hrangte puihna chu lawmawm a tih thu a sawi. "Hero kan ni lo. He mission hi mitinte thawhhona ṭha tak avangin a hlawhtling a ni. SEALS tan chuan hei hi kan tih tur a ni. Navy chuan motto : 'Mi tumah kan thlahthlamin kan kalsan ngai lo ang' tih kan nei a ni", a ti.

Puka tangte chhanchhuah hna thawhnaah hian Britain,US, Japan, Laos, Myanmar, China leh Australia ten an pui a, hei bakah hian Denmark, Germany, Belgium, Canada, Ukraine leh Finland aṭangin volunteer an awm bawk. Narongsak chuan puk chhunga aṭanga football team te lakchhuah hna thawktu, diver rual 18 zinga 13 chu British mi an ni tih sawiin, panga chu Thai Navy SEAL diver an ni tih a sawi.

Narongsak Osottanakorn chuan rawlthar 12 leh an coach chhanchhuahna hmun, Tham Luang puk chu chhanchhuah hna hautak tak thawh a nih dan pholan zui a nih theihna turin museum-ah siam zui a ni dawn tih a sawi. Osotannakorn chuan data base te siamin, khualzinte hiptu lar tak a ni zui thei dawn niin a sawi. Tourist destination-a siam a nih rual hian, puk chhung leh pawn lamah khualzinte himna tur ruahmanna fel tak siam a ni dawn niin official-te chuan an sawi.