Sharif-te pafain Pakistan pan Pakistan thlen rualin man nghal an ni dawn

Pakistan Prime Minister hlui Nawaz Sharif leh a fanu, Maryam te chuan nimin khan Pakistan rama kir an tum a, hetihlai hian Pakistan thunietute chuan an pafa hian Pakistan an thlen rual man nghal turin a ti. Sharif-ate pafa hi eiruk thubuaiah thiam loh chantir an lo ni tawh a ni.

Muslim League-Nawaz (PML-N) hotu Nawaz Sharif leh a fanu chuan an puhna hi thu dik lo niin an sawi. Sharif-a a nu, Kalsoom Nawaz-i damloh avangin London-ah a hun tam zawk a hmang a ni. Mahse nimin khan Pakistan hmalam dinhmun thlirin, man nghal tura tih ni mah se an kir tur thu hi a sawi. Sharif-a chuan, "Pakistan ka thlen rualin jail-a hruai nghal tura tih kan ni a, mahse Pakistan tan he thil hi ka hmachhawn ngei a ngai a ni. Pakistan dinhmun siamṭha tur hian kan beih a ngai a ni", a ti.

Sharif-a te pafa hian London aṭangin Abu Dhabi an pan a, hetaṭang hian Pakistan-a Lahore airport an pan dawn a, nizan khan Lahore hi an thleng ang. Lahore airport-ah hian Sharif-a thlawptu mi tam tak chu lo hmuah tumin an pungkhawm a, heng mite hi police-ten hnawhdarh an tum a ni. Sharif-a te pafa kir dawn vang hian an party mi leh sate buaina an siam venthawn thilah Lahore-ah hian venhim hna thawk turin police officer 10,000 chuang dah an ni

Pakistan dan hnuaiah Sharif hi MP hlui a nih avangin jail-a 'better class' category a dil thei dawn a, a fanu Maryam pawhin annual income tax-ah Rs 600,000 a pe tih finfiahna a pek theih chuan a dil thei bawk ang. 'Better Class' category hnuaiah hian jail tangte hian lehkhabu, nitin chanchinbu, 21 inch TV, dawhkan chair leh mattress te an dawng thei dawn a, mahse heng mante hi anmahniin a pek a ngai ang. Hei bakah hian venhimna ṭha tak pek an ni bawk ang.

Media report chuan Sharif leh Mayram hi Lahore airport aṭang hian helicopter hmangin Adiala Jail-ah hruai nghal an ni dawn niin a sawi. Airport leh jail-ah hian helicopter pahnih chhawp lawk a ni.

Nawaz Sharif-a hi eiruk thubuai siamsak a ni a, Panama case leak-ah amah leh a chungte hming a lan avangin Pakistan Supreme Court chuan prime minister a nihna aṭanga bang turin alo nawr tawh a ni. Sharif-a hi London-a Park Lane-a Avenfield-ah hmun a lei vangin thiam loh chantir niin kum 10 tang tura hrem a ni tawh a, a hmun lei hi thuneituten an laksak tawh bawk a ni. A fanu Maryam hi kum sarih tang tura hrem a ni bawk.

Nikum July thlaa eiruk thubuaia thiam loh chantir a nih vanga Supreme Court-in prime minister aṭanga a bantir hnuah, court chuan an party PML-N hotua a awm zui a khap bawk. Hei vang hian a unaupa Shehbaz chu PML-N president atan dah a ni a, mahse a phena thuneitute ber chu Sharif-a hi a la ni zui tho a ni.