Kim-a lehkhathawn tlangzarh

US President Donald Trump chuan North Korea ram hotu lu ber Kim Jong-un an lehkha a thawn chu Ningai khan twitter-ah a tarlang a, he lehkhathawnah hian Kim chuan US-NKorea inlaichinna ṭha zawk a awm chhoh zel a beisei thu a ziak a ni.

Kim Jong-un chuan June thlaa President Trump nena Singapore-a meeting an neih chu bul ṭan tharna tur thil chhinchhiahthlak tak a nih thu a sawi. President Trump nena ram pahnihte inkar boruak ṭha zawk siam tura an hmalakna chuan rah ṭha tak a chhuah ngei a rin thu a sawi bawk.

He lehkhathawn hi July 6-a Kim an a thawn a ni a, Trump hian a twitter-a hian Korean ṭawng bakah English-a letlinna nen a tarlang a, hmasawnna ropui tak an siam thu a ziaklang tel a ni.

Kim-an Trump-a lehkha a thawn hi US Secretary of State Mike Pompeo-an ni thum chama NKorea a tlawh lai vela mi a ni. US State Department thupuangtu Heather Nauert chuan Pompeo leh Kim hi inhmu lo mah se, Pompeo hian Trump-an Kim tana lehkha a thawn chu a hnutchhiah bawk niin a sawi.