Donald Trump-an London a tlawh

US President Donald Trump chuan Ningani khan zan khat riakin London a tlawh a, hetihlai hian Trump-an London a tlawh hi duh loin mi tam takin lungawi lohna an lo lantir a, nimin pawh khan nawrh hi huaihawt chhunzawm a ni.

President Trump-an tunhnaia immigration policy a siam thar hmanga an rama luh tum puitling leh an fate lak hran an nih chungchang duh lohna lantirin London-ah hian mi tam tak an pungkhawm a ni. Nimina pungkhawmte hian parliament chungah Trump-a lem balloona siamte an chhuah bawk.

Trump hian Ningani khan Winston Churchill-a pianna leh a naupan lai hun a hmanna, kum zabi 18 hunlaia sak Blenheim Palace a tlawh. He hmunah hian Britain Prime Minister Therasa May-i chuan Trump-a pual hian zanrirah a buatsaih sak a, senior minister bakah sumdawng lian mi 100 vel an tel. Nimin khan hruaitu pahnihte hi prime minister official country resident, Chequers-ah an inkawm zui a ni. He hunah han Russia, trade, Brexit leh Middle East chungchangte an sawidun.

Nimin vek khan Trump hian Britain lalnu, Queen Elizabeth II chu Windsor Castle-ah a hmu a, chhun thingpui an in dun.