A thubuai pakhatah Brazil president hlui thiam chantir

Brazil President hlui Luiz Inacio Lula da Silva chu a thubuai pasarih zinga pakhatah thiam chantir a ni. Hetihlai hian eiruk thubuaia thiam loh chantir a nih tawh avangin Lula hi jail-ah a tang mek a ni.

Federal Judge Ricardo Leite chuan Senator hlui Delcio do Amaral-an President hlui hian eiruk thubuaia thuhretu pakhat thamna pe turin a hrilh nia a puhna chungchangah Lula hi thiam a chantir. Hemi chungchanga president puhnaah hian finfiahna rintlak a awm lo nia sawiin prosecutor-te chuan he thubuai hi tihtawp turin an ngen a ni. Leite chuan Lula bakah Do Amaral leh sentor chief of staff hlui Diogo Ferreira te pawh thiam a chantir bawk.

Kum 2015 khan do Amaral hi Petrobas executive hlui Nestor Cervero hnenah state oil company-a eirukna thleng mek chhui chungchanga a hming sawilang lo tura ngenna thamna pek a tum lai record a nih avangin man a lo ni tawh a ni. Thu zawhfiah a nih hnuah Do Amaral hian heng pawisate hi Lula-an pe turin a ti niin a sawi.

Kum 2003-2011 chhunga Brazil president dinhmun lo chelh tawh, Lula hi nikum July thla khan eiruk thubuaiah thiam loh chantir a ni a, kumin April 7 khan tan-inah dah a ni. Hetih lai hian kum 72 mi, Lula hian an puhnate hi thu dik lo niin a sawi a, a party, Workers Party (PT) pawhin president thlanna neih tura an party candidate turin a puang tawh bawk.