France President-in Covid-19 hnehna hmasa a puang

France president Emmanuel Macron chuan Pathianni khan an rama Covid-19 hri dona kawnga hnehna hmasa ber a puan bakah, nimin aṭang khan inthlahdulna kalpui chhoh a nih tur thu a sawi.

Nimin aṭang khan Europe ramte chu France rama zin luh phal a ni a, ramdang aṭang chuan July 1 aṭangin zin luh phal a ni chauh ang. Hnathawh pawh phal a ni chho ṭan a; restaurant, bar, cafe leh thil zawrhna hmun tam zawk chu hawn ṭan tum a ni. June 22 aṭangin school leh college leh zirna in dangte hawng tura hmalak a ni bawk.

 

Nursing home pawh tlawh theih tura hawn tum mek a ni a, municipal election thawh hnihna pawh June 28-a neih tum a ni. Inkhuahkhirhna hrang hrang hi thlahdul chhoh tum ni mah se, mipui punkhawmna erawh khap zui zel a la ni dawn. "Covid-19 kan dona hi a la tawp lo a, mahse inkharkhipna leh inkhuahkhirhna hrang hrang kan thlahdul chhoh dawn avangin hnehna hmasa ber kan puang thei erawh ka lawm a ni," tiin Macron chuan a lawmthu a sawi. 

Kar liam ta Inrinni khan France-a Covid-19 hri vanga thi chu mi 24 an awm a, anni nen hian he hri vanga thi hi mi 29,398 an tling tawh tih France National Public Health Agency chuan a tarlang. Inrinni vek khan hri kai thar mi 526 an awm a, hri kai hmuh chhuah hi mi 1,56,813 an tling tawh tih Health Agency chuan a tarlang bawk.

He hri vanga damdawi-ina enkawl an tlem tial tial a, kar liam ta Inrinni khan damdawi-ina hri kai enkawl mek hi 11,124 an awm a, nimin chuan enkawl mek hi mi 10,909 chauh an awm tawh thung. Dam lo enkawl mek zinga ventilator ngai pawh mi 871 aṭangin pariatah a an tla thla tawh tih Health Agency chuan a tarlang.

Macron-a'n Pathiannia mipuite hnena Covid-19 hri leng chungchanga hriattirna thuchah a sawi hi March thla aṭanga ṭum lina a sawina a ni a, he hunah hian Macron chuan July thlaah mipuite hmaah thu a sawi leh tur thu hi a puang zui nghal a ni.