Japan-in khualzin luh khapna thlahdul lo

Japan foreign minister Toshimitsu Motegi chuan hri leng avanga ram dang mite luh khapna siam, sorkarin a thlahdul tawh dawn nia sawi chu thu dik lo a nih thu a sawi a, khuahkhirhna hi hman chhunzawm zel a ni dawn, tiin nimin khan a sawi.  

Japan ram hian an rama hri leng darh tur venna atan ram ṭhenkhat aṭanga luh khapna a siam a ni. Report ṭhenkhat chuan he khapna hi thlahdulin, Australia, New Zealand, Vietnam leh Thailand ram aṭanga luh a phal tawh dawn niin an sawi a, mahse hei hi minister chuan  thu dik lo a nih thu a sawi a ni. 

Motegi chuan Parliament-ah hemi chungchang hi sawiin, sorkar chuan thil awmdan a thlithlai reng a, boruak awmdan azirin khuahkhirhna siamte pawh thlahdul a la ni ang, a ti. Mahse tunah chuan eng thutlukna mah siam a la ni lo tih a sawi a ni.