China leh Pakistan-in India aiin nuclear ralthuam nei tam zawk
Swedish Defence think-tank, Stockholm International Peace Research Institute (SIPRI) chuan China leh Pakistan chuan India aiin nuclear ralthuam an neih tam thu nimin khan a tarlang.
SIPRI hian yearbook 2020 a tichhuak a, a report-ah hian India chuan nuclear ralthuam 150 a neih mek thu leh, China-in 320 a neih bakah Pakistan chuan 160 a neih thu a tarlang a ni.
Nuclear ralthuam neih chungchangah hian SIPRI chuan kumin January thla thleng dinhmun a tarlang a ni. Nikuma SIPRI-in yearbook a tihchhuahah khan China hian nuclear ralthuam 290 a nei a, Pakistan hian 150-160 a neih bakah hian India hian 130-140 a nei bawk niin a sawi.
China hi nuclear ralthuam siam chhuah lamah leh neih hnem lamah ṭan a lak mek thu SIPRI chuan a tarlang a, nikum nena khaikhin chuan India leh Pakistan hian hma an sawn lo hle a ni. US leh Russia chu nuclear ralthuam neih tam lamah an sang ber a, US hian 5,800 a nei a, Russia hian 6,375 a nei niin a tarlang bawk. An pahnih hian khawvela nuclear ralthuam 90% an nei tling pha a ni.
Khawvela nuclear ralthuam nei tam ram pakuate chu US, Russia, United Kingdom, France, China, India, Pakistan, Israel leh North Korea-te an ni a, an vaia belh khawm hian nuclear ralthuam 13,400 an nei a ni. Nikum khan heng ram pakuate neih zat hi 13,865 a ni a, kuminah hian a tlahniam a ni.