Philippines journalist thiam loh chantir

Philippines journalist lar, CNN journa­list hlui ni bawk Maria Ressa chu a news site, Rappler-a article ziah chungchangah thiam loh chantir a ni a, he thu ziaktu Rappler journalist Reynaldo Santos Jr pawh thiam loh chantir a ni bawk. 

He thubuai hi kum riat liam taa mi a ni. He site-a Reynaldo Santos Jr article ziahah, sumdawng lian Wilfredo Keng chuan ruihhlo tawlhruk leh human trafficking lama inhnamhnawihna neiha puh a ni. Keng hian an rama top judge chu a car a hawhtir niin a tarlang  bawk.

Rappler-a article ziah a nih hnuah thla liah Philippines hian 'cyber-libel' law siamin, he dan hmang hian thubuai siamsak an ni zui a ni. Nimina an thubuai ngaihtuahnaah judge chuan Keng puhna chungchanga Rappler hian finfiahna pek tur a nei lo niin a sawi. Ressa leh article ziaktu hi thiam loh chantir an ni a, kum ruk thleng tantir theih an ni ang. 

Ressa chuan an puhna hi thu dik lo leh, politics inrawlhah a puh. Mahse President Duterte leh a lamṭangte chuan Ressa leh a news site chu thu dik lo report-ah an puh thung. 

Maria Ressa hi Philippines-a piang, US-a seilian niin, kum 1980 khan Phili­ppines-ah a kir a, kum 2012-ah news site Rappler hi a siam a ni. He site-ah Philippines president Rodrigo Duterte rorel dan leh, ruihhlo dona beihpui a thlaknaa sorkar chetdan rawng tak sawisel ngamtu site tlemte zinga mi a ni. 

President Duterte a sawisel ngam avangin thuneitu lam pawhin an ngaimawh a, thubuai dang pawh a nei fo a ni. Chhiah awlruahte leh foreign ownership dan bawhchhiaahte puh a lo ni tawh bawk.