NKorea leh US sipai official-te inhmu

North Korea leh US sipai official-te chu Korean War laia US sipai thite ruhro lak dan chungchang ngaihtuahin nimin khan Korea ramri bul khuaah an inbia.

June 12-a Singapore-a US President Donald Trump leh North Korea hotu Kim Jong-un ten meeting an neih ṭum khan, 1950-1953 Korean War laia US sipai thite ruhro lakna tur hian inremna an lo siam tawh a ni. Hruaitu pahnihten inremna an lo siam bawhzui dan tur ngaihtuahin nimin khan ram pahnih sipai official-te chu Korea ramri bula Panmunjon khuaah an inhmu a ni.

Tun hnaia NKorea tlawhtu, US Secretary of State Mike Pompeo chuan sipaite ruhro lak tur chungchang ngaihtuahin kar kalta Ningani khan meeting neih a ni dawn tih a lo sawi tawh a ni. Mahse Ningani khan NKorea lam aiawhte hi an inlan lo a, nimina inhmu zawk tur hian an ti ta a ni. Sipaite hotuten inbiakna an neih hma hian ramri bulah US sipai thite ruhro dahna tur kuang eng emaw zat chhawp lawk nia sawi a ni bawk.