Balochistan bomb puaka thi mi 130 tling

Pakistan-a Balochistan-a election rally neihnaa thihchilh bomb puak vanga thi chu mi 130 an tling tawh.

Kar kalta Inrinni khan Balochistan Awami Party (BAP) leader Siraj Raisani-an rally a neihna, Mastung area-ah thihchilh bomb tihpuah a ni. He bomb vanga thi zingah hian PB-35 (Mastung)-a BAP candidate Raisani pawh a tel a ni. Bomb puahnaah hian a hmunah mi 128 an thi a, hliam tuar mi 200 chuang awmin an zinga pahnih chu an hliam tuar loin an thi ve leh a ni. Hliam tuar zinga mi 20-te chu an ngaihtuahawm hle nia sawi a ni bawk.

Pakistan Prime Minister Office chuan thuchhuah siamin, kar kalta Thawhlehni-a Peshawar leh Inrinni-a Mastung leh Bannu-a firfiakte pawikhawihna thlen vanga thite sunna ni atan nimin khan ram pumah hman a ni tih a sawi. Ram pumah hnam puanzar chu a ngul chanve-ah zar a ni.

July 25 hian Pakistan inthlanpui buatsaih a ni dawn a, inthlanpui neih tura atana inbuatsaihnaah pawikhawihna a thleng fo a ni. National Coordination Counter-Terrorism Authority (NACTA) chuan inthlan neih tura denchhen hian firfiakten politician lar zual eng emaw zat beih an tum mai theih thu sawiin, beih an tum zingah hian Imran Khan, ANP head Afsandyar Wali, Qaumi Watan Party (QWP) chairman Aftab Ahmad Khan Sherpao leh PML-N hruaitute an tel niin a lo sawi tawh a ni.