Mexico president elect-in official-te hlawh titlem dawn

Mexico president atana thlan Andres Manuel Lopez Obrador chuan a kaihhruai sorkarin inrenchemna a kalpuina tur kawng khat atan amah telin high-level official-te hlawh chu a titlem dawn tih Pathianni khan a sawi.

Lopez Obrador hian a campaign headquarters-a chanchinthar lakhawmtute a kawmnaah he thu hi a sawi a, official-te hlawh a tihhniam rualin an ram budget chuan mitin a thlen phak nan natin minimum wage chu a tisang dawn tih a sawi bawk.

December 1-a Mexico President atana lakluh tur Lopez Obrador hian president a nih hunah thla khatah pesos 108,000 ( US dollar 5,700) a hlawh dawn tih a sawi a, hei hi a thlak chuan President Enrique Pena Nieto hlawh aṭanga 40% vel chauh a ni pha a ni.

President-elect hian president hluite hnena pension tam tham tak pek ṭhin chu a tihtawp tur thu a sawi bawk a, hei bakah hian official leh lawmaker-te hnena bonus pek ṭhin pawh a titlem dawn bawk. Hei bakah hian eiruk do letna turin dan siam a tum bawk a ni. Official-te chuan an thil neihte puangzar tura tih an ni ang a, eirukna chu pawikhawihna lian tak anga ngaih a ni tawh dawn a ni, a ti.