Iran nuclear deal: US-in EU ngenna a hnawl

US-in Iran nuclear deal aṭanga a inhnuhdawh hnua Iran ram hrekna siamah European company-te huam tel tir lo tura Europrean Union in a ngenna chu US chuan a hnawl.

European ram hnena lehkha a thawnah, US Secretary of State Mike Pompeo chaun Iran hrekna na thei ang ber siam an duh avangin EU ngenna hi hnawl a nih thu a sawi. US security atana ṭha tur nia hriat a nih chauhin ngaihnathiamna hi siam a ni dawn tih a sawi.

EU chuan US hrekna siam vang hian insumdawn tawnna dollar tluklehdingawn tel chu a chhiat phah mai a hlauhthawnawm niin a sawi a ni.

Kum 2015-a Iran leh world power ram paruk-ten nuclear deal an siam aṭangin kumin May thla khan US chu a inhnuhdawk a ni. US President Donald Trump chuan he inremna siam hi a ṭha tawk lo a, huam zau zawka siam a nih loh chuan an tel chhunzawm tawh dawn lo tih a sawi a ni. Nuclear deal aṭanga US a inhnuhdawh hnu hian Iran hrekna na zawk a siam nghal a ni. He hrekna a siam hian sumdawnna lama Iran thawhpuitu European company hrang hrangte a huam tel.

Kum 2017 khan EU hian Iran-a bungrua a thawnluh hi dollar tluklehdingawn 12.9 hu a tling a, Iran aṭanga bungrua a lakluh hi dollar tluklehdingawn 10.1 a tling bawk. Mahse US-in a hrek avangin Iran nena insumdawn tawnna kalpui chhunzawm zel chuan US nena an inzawmna lamin a tuar an hlau a ni.