Haiti Prime Minister a bang

Haiti Prime Minister Jack Guy Lafontant chu sorkarin fuel man tihsan a tum avanga mipuiten duh lohna lantir a, buaina nasa tak a chhuah avangin a bang .

Jack Guy Lafontant chuan kar kalta Inrinni khan President hnenah a banna hi thehlutin, a lo pawmsak nghal niin a sawi.

Haiti sorkar hian kar hmasa khan an ramah fuel man tihsan nih tur thu a puang a, gasoline man chu 38%-ah tihsan a nih tur thu leh, diesel chu 47% leh kerosene chu 51% a tihsan a nih tur thu a puang a ni. Hei hi mipuiten duh loin an khawpui Port-au-Prince leh khawpui dangahte nawrh huaihawtin buaina nasa tak a chhuak a, buaina chhuakah hian mi pali in nunna an chan a ni.

Nawrh huaihawtte hian dawrte an rawk bakah motor pawh eng maw zat an hal bawk. Buaina a chhuak avang hian sorkar chuan fuel man tihsan a tumna hi a sut leh nghal a ni.