July 19-ah Thailand football team te chhuak thei dawn

Thailand-a Tham Luang puk aṭanga chhanchhuah, Wild Boars football team-a rawlthar 12 leh an coach-te chu Chiang Rai Prachanukroh Hospital-ah enkawl mek an ni a, July 19 hian damdawi-in aṭangin an chhuak thei tawh dawn niin doctor-te chuan an sawi.

Thailand Public Health Minister Dr Piyasakol Sakolsattayatorn chuan rawlthar kum 11-16 inkar, mi 12 leh an coach kum 25 mite hi an hriselna dinhmun pawh a ṭhain, anmahni pawh an chak sawt hle niin a sawi. Infection an neih leh neih loh endik an nih hnuah an zinga ṭhenkhat chuan pneumonia an nei a, mahse hei pawh hi a nasa lo a, tunah chuan an dam fel tawh niin a sawi bawk.

Hospital chuan thu chhuah siamin, rawltharte chu puka hun rei tak an tan vanga an rilru lama nghawng a neih tur venna atan ṭhiante leh chhungte bula hun an hman tam a ngai tih an sawi a, hemi rual hian media lamin bawr buai lo se an duh thu an sawi.

Football team-te puka an tan laia anmahni ṭanpui tura kal, oxygen tlakchham vanga thi Thai Navy Seals diver hlui Saman Gunan chungchang hi kar kalta Inrinni khan rawltharte leh an coach-te hi hrilh ve chauh an ni. Health Ministery permanent secretary Jedsaka Chok-damrongsuk chuan Gunan-a thih dan hrilh an nih chuan an rilru a ti nain an lungchhe hle niin a sawi a, sunna thute an ziah bakah a sunnan ngawi rengin minute khat an ding bawk a ni, a ti. An tana nunna hlantu, Saman Gunan chungah lawmthu sawiin, mi ṭha tak nih zel an tum thu an tiam bawk.