Trump leh Putin-ten summit nei

US President Donald Trump leh Russia President Vladimir Putin-te chuan Thawhṭanni khan Helsinki, Finland-ah a ṭum khatna atan one-on-one summit an nei.

Summit hi Finland presidential palace-ah neih a ni a, meeting zawh hian Hall of Mirros-ah chaw chhun an kil nghal bawk. Hemi hnu hian hruaitu pahnihte hian joint press conference an nei leh nghal a ni.

Inbiakna an neih hma hian President Donald Trump chuan Russia leh US inlaichinna chu a chhe ngai lo niin a sawi a, US politician hmasate kha atthlak takin an lo che ṭhin zawk niin a sawi. Ram hruaitu pahnihten a ṭum khatna atana inbiakna an neih theih tak avang hian US leh Russia inlaichinna pawhin bung thar a kai ngei rin a ni bawk.

Trump chuan Russia nena inlaichinna ṭha siam zel a tiam a, Russia-in World Cup football tournament hlawhtling taka a thlen avangin lawmpuina a hlan nghal bawk. Putin pawhin khawvel chuan inhuatna leh inhriatthiam lohna an neihte an paihbo a hun tawh a ni, a ti.

Hruaitu pahnihte inkawmnaah hian an ṭawnglettute chiah an tel a, minute 90 chhung inkawm tura ruahman ni mah se darkar hnih chuang zet meeting hi an nei a ni. Meeting-a an thu sawite hi kimchanga puanzar ni lo mah se, Trump chuan Putin nena an meeting chu bulṭanna ṭha tak a nih thu a sawi.

Hetihlai hian US Congress member ṭhenkhat chuan kum 2016 President thlannaah Trump-a a tlin theihna atana Russia chu inrawlha puh a lo nih tawh vangin Trump-Putin meeting neih tur hi a hma aṭangin an lo sawisel lawk a ni.