Lava bomb vangin mi 23 in hliam tuar

Hawaii-a Big Island-a Kilauea tlang kangin lava bomb a vawrhchhuah chuan tuifinriata khualzin phurtu lawng a fuh a, mi 23 in hliam an tuar niin Hawaii County Civil Defense Agency chuan a tarlang.

Lava bomb basketball tiat zet chuan lawng chung hi a fuh a ni. Hliam tuar zingah pakhat tih loh chu ngaihtauhawm an awm lo nia sawi a ni.

Lava Ocean Tours Inc. lawng hi US Coast Guard-in tlang kanna hmun aṭanga hmun him china a puana awm a ni. He lawngah hian mi 52 an chuang a, thawktu pathum leh passenger 49 an ni. Boat railing pakhat pawh a chhe tel nia sawi a ni bawk.

Kumin May thla aṭang khan Kilauea tlang kang hi a invawrh chhuak fo a, chenna in pawh eng emaw zat a tichhe tawh a ni.