Nepal-in Bimstec Summit a thleng dawn

Nepal chuan August 30-31 hian Bimstec Summit vawi li-na a thleng dawn.

Bimstec-ah hian Bangladesh, Bhutan, India, Myanmar, Nepal, Sri Lanka leh Thailand te an tel. Nepal foreign minister Pradeep Gyawali chuan summit neihna tur atan hian an inbuatsaih ṭan tawh tih sawiin, summit hlawhtling tak an neih ngei a beisei thu a sawi.

Nepal ram danpui siamṭhat a, sorkar thar a din hnua regional leader te intawhkhawm an thlenna hmasa ber tur a ni a, sorkar pawhin he summit neih tur hi a dah pawimawh hle a ni, a ti.

Summit ṭan hma, August 2 hian senior official meeting neih ani ang a, August 30-ah ministerial meeting neiin, August 31-ah ram hotu luten meeting hi an nei zui dawn a ni. Bimstec hnuaiah he summit hi policy-making leh dicision-making body sang ber a ni.

Kum 2004-a Thailand-a Bimstec ministerial meeting neihah khan summit hi kum hnih danah neih an rel a, mahse hetichung hian summit hi ṭum thum–2004, 2008 leh 2014 ah chauh an la nei thei a ni.

Bimstec hian kawng 14-a member ramte thawhhona tur a thlur bing a, chungte chu trade and investment, technology, energy, transport and communications, tourism, fisheries, agriculture, cultural cooperation, environment and natural disasters, public health, poverty alleviation, people-to-people contacts, counter-terrorism leh climate change te an ni.