Israel-in Gaza kawng dan tikhauh dawn

Israel chuan Palestinian firfiak pawla a puan, Hamas-ten Gaza Strip aṭanga Israel ram beihna chi khat atan lehkhachaih leh balloon hal chunga an chhuah ṭhin beih let leh, tihtawp tuma hma lakna atan Gaza Strip kalpawhna kawng a dante khauh zawka kalpui a tum.

Ram pawn lam aṭanga Hamas rorelna, Gaza Strip-a bungraw phurh luh chungchang buaipuitu committee chairman, Raed Fattouh chuan Israel sorkar chuan Gaza leh Israel inkar commercial crossing awmchhun chu a khar dawn tih committee hnenah a hriattir tih a sawi a, thupek dang tihchhuah a nih leh chuan damdawi tih loh chu eng bungrua mah lakluh theih loh tura khar a ni dawn tih a sawi.

Hetihlai hian Gaza Fishermen Association chairman Nizar Ayyash chuan Israel hian Palestinian liason officer hnenah Gaza-a chengte tana tuipuia sangha man theihna area a siamsak pawh a tizim tawh tih a hrilh niin a sawi a, tuipui mel ruk china sangha man an phalsak chu mel thumah a tihzim sak a ni.

Egypt pawhin Gaza nena an inkalpawhna, Rafah crossing chu khawl lam fel loh vangin a khar dawn bawk a ni. Rafah crossing hi May 16 aṭang khan hawn a ni a, kar tawpah khar a ni chauh ṭhin.

Israel Prime Minister Benjamin Netanyahu chuan Israel sipaite hnenah Gaza Strip aṭanga Israel chhim lama balloon leh lehkhachaih hal an chhuah ṭhin lo beilet tura a hriattir thu a sawi. Hetianga balloon leh lehkhachaih hal an chhuah vang hian Israel chhim lamah hian ram eng emaw zat a kan phah tawh a ni.

Palestinian ṭhalaite hian March 30 aṭang khan Israel-in an ram a luahsak pek let phuta lungawih lohna lantirin 'Great March of Return' an buatsaih a, he nawrh huaihawt a nih aṭang hian lehkhachaih leh balloon halsa hi Israel ram chinah an chhuah ṭan a ni.

Gaza Health Ministry chuan Gaza ramri-a nawrh huaihawtte leh Israel sipaite inkara buaina thlengah Palestinian mi 139 an thi tawh a, mi 16,000 chuangin hliam an tuar bawk niin a tarlang.