US-in 2022 Beijing Olympics-ah sorkar official tir dawn lo
United States chuan 2022 Beijing Olympics neih tur chu diplomatic boycott a nei dawn tih sawiin, he hunah hian sorkar official-te a tir dawn lo tih a sawi.
China rama mihring dikna chanvo nasa taka palzut sak an nih avangin lungawi lohna lantirna atan diplomatic boycott hi a nei dawn White House chuan a sawi a, mahse an puhna hi China sorkar chuan phain, thil awmze nei lo niin a sawi thung.
White House press secretary Jen Psaki chuan, President Biden kaihhruai US sorkar chuan Beijing 2022 Winter Olympics leh Paralympic Games neih turah ram palai emaw, official emaw pawh a tir dawn lo a, hei hi Xinjiang biala Muslim Uighur-te laka pawikhawihna thleng vang te, China ram chhunga human rights palzutna nasa tak thleng vangte a ni, a ti.
Psaki chuan diplomatic boycott nei tur hian US Congress member ṭhenkhat chuan thla eng emaw zat an lo nawr tawh tih a sawi a,mahse hemi avang hian he huna America infiam mi tel turte engmah a nghawng dawn lo a, infiammite chu sorkar chuan a thlawp tlat a ni, a ti bawk.
Washington-a China embassy chuan US boycott kalpui tum hi politics a inhnamhnawih nia sawiin, hei hian Olympics neih tur hi a nghawng phah dawn lo tih a sawi. Embassy thupuangtu Liu Pengyu chuan, "US politician-te sawmna pek an ni lo a, 'diplomatic boycott' an neih tum hi thil awmze nei lo a ni," a ti.
Nakkum February 4-20-a neih tur, Winter Olympics-ah hian New Zealand chuan ram palai tirh a tum lo tih a sawi bawk a, mahse hei hi US thutlukna siam vang ni loin, Covid-19 hri leng vang zawk a nih thu deputy prime minister Grant Robertson chuan a sawi.
US President Biden chuan Ningani leh Zirtawpni hian 'Summit for Democracy' chu virtual hmangin a kaihruai dawn a, he hunah hian ram 100 chuang aṭangin ram hruaitu leh civil society hruaitute an tel ang. He hun hi President hian mahni ram chhung leh ram pawn lamah pawh democracy venhim leh, human rights humhalh a ṭul zia ;mimal leh pawl, ram anga hma lak a ṭul zia sawina atan a hmang dawn niin thuneitute chuan an tarlang.