Rohingya raltlante'n Facebook an khing

Rohingya raltlante chuan social media giant, Facebook chu an platform-a inhuatna leh thinrimna chawk chhuak zawnga thu thehdarhte a dan loh avangin, Myanmar-a Rohigya Muslim-te lakah tharum thawhna a thlen hluar phah nia sawiin a khing a, USD tluklehdingawn 150 chawi turin an phut.

Complaint hi California court-ah thehluh a ni a, US-a hmunpui nei Facebook hi pawikhawihna thlen thei leh ngaihtuahna hruaipeng thei thuthang dik tawk lo thehdarhah an puh a ni.

Facebook-a thu dik tawk lo leh inhuatna lam chawk chhuak thei thehdarh vangin, Rohingya mi sang telte nun a chhiat phah a ni, tiin an sawi.

Myanmar-ah hian Muslim hi sakhaw tlem zawk niin, enhran pawh an hlawh hle. Kum 2017 khan sipaite beihpui thlak vangin Rohingya Muslim mi nuai tel hi Bangladesh ramah an tlanchhia, tun thlenga refugee camp hrang hrangah an la awm hlawm. Tlanchhe lo, Myanmar rama awmte pawh khua leh tui nihna an pe duh lo a ni.

Kum 2018 khan UN human rights investigator-te chuan Facebook hi inhuatna chawh chhuahna leh tharum thawhna thlenna atan hman a ni nasa hle tih an lo sawi tawh. Hemi kum veka Reuters-in a chhui chiannaah pawh, Rohingya leh Muslim-te beihna lam post hi Facebook-ah 1,000 chuang hmuh tur a awm thu an sawi.

International Criminal Court chuan dan bawhchhiatna thleng chungchang hi a chhuichiang a ni. September thla khan US federal judge chuan Facebook chu Myanmar-a Rohingya-te laka pawikhawihna thlentu account-te chu puangzar turin a lo ti tawh bawk. Heng account-te hi Facebook lam chuan an tihtawp sak tawh a ni.

Rohingya raltlanten an khin chungchangah Facebook lam hian thuchhuah engmah an la nei lo.