Omicron variant hi Delta aiin a hlauhawm bik lo : US top scientist

Covid-19 hri chi thar, Omicron variant chungchang ram hrang hrangten an buaipui mek karah, US top scientist Dr Anthony Facui chuan Omicron hi inkaidarh awlsam mah se, Delta variant aiin a hlauhawm zawkin a thawk na zawk hran lo niin a sawi.

White House-a virtual briefing a neihah, National Institute of Allergy and Infectious Diseases director Dr Anthony Fauci chuan, an inkaidarh dan enin hri inthlak danglam tawh, Omicron leh variant dangte chu inkaidarh a awl zawk nia a lan thu a sawi a, ram hrang hrangah hri kai thar pawh an pung chho a, Omicron hian Delta variant pawh a rawn luahlan chho mek niin a sawi. Hemi rual hian Omicron variant hi thawh nat dan lo sawina atan chuan a la hma niin a sawi nghal bawk.

South Africa data aṭanga a lan danin, hri kai thar zingah la na lutuk leh, dinhmun ngaihtuahawm lutuk an awm lo a ni, a ti. Hetih lai hian Covid hri kai tawh zingah Omicron kai nawn leh pawh an pung chho hle thung a ni tih a sawi.

Kar reilote hnuah Omicron variant chungchang hi chiang zawkin hriat theih a nih theih tur thu sawiin, he hri kai zinga la na leh ngaihtuahawm deuh an awm a nih pawhin he variant kai tamna, South Africa lam aṭangin a nih a rinawm thu a sawi bawk.

"Hri lengin ngawng a neih dan ngaihtuah chuan, damdawi-in panpui ngai leh thihpui chhinchhiahna lamah kan hnufual hle a ni. Ka ngaihdan chuan kar khat chuang vel kan la mamawh a, chumi hnuah a hmachhawn dan kan thiam theih tawh kan ring. Tun hi thuthlukna chiang tak siam hun a la ni lo a, tunhnaiah phei chuan kan siam mai tur ala ni lo" tiin Fauci chuan a sawi.

Covid-19 variant thar ber, B.1.1.529 hi November 25 khan South Africa chuan hmuh a nih thu World Health Organisation (WHO) hnenah a report a ni. WHO chuan November 26 khan he variant hming hi 'Omicron' tiin a phuah zui bawk.

Vaccine-in Omicron lakah veng thei : WHO
WHO chuan vaccine-in Omicron lakah min ven theih thu sawiin, vaccine hmanlai pawh hian Covid Omicron variant lakah mipuite chu a veng thei a ni, tiin WHO official-te chuan an sawi.

South Africa-a variant thar hi laboratory test an neih hmasak berah khan he variant hian Pfizer vaccine a pumpelh ṭhen thei a, strain thar hian vaccine laka min ven theihna chu a tichawmawlh theih thu reseacher-ten an lo sawi a ni.

Mahse Dr Mike Ryan chuan variant dangte aia Omicron-in vaccine laka min ven theihna leh a pumpelh theihna a san bik chuan loh thu a sawi.

"Variant awm tawhte laka min veng thei turin vaccine ṭha tak tak kan nei a, la na tak leh damdawi-ina dah ngai khawpa na a awm chuang lo. Vaccine hnathawhte hi Omicron lakah hian an danglam bik tura ngaihna tur a awm lo, " tiin WHO emergencies director Dr Ryan chuan a sawi.