Israel-in leihnuaia Gaza daidanna bang siam a zo ta

Israel chuan Gaza daidanna, lei hnuaia 'iron wall' a siam chu kum thum leh a chanve hnuah zo fel ta tih a sawi.

Kum 2014-a Gaza Strip-a rorellai, Palestinian firfiak pawl Hamas-ten lei an verh aṭanga Israel an beih hnuah, Israel chuan lei hnuaiah daidanna bang siam hna hi a kalpui ta a ni. He project kalpui a nih thu pawh hi Israel chuan a zep lo a, lei hnuaiah hmanraw ṭha taka thuam bang a siam bakah hian lei chung lamah pawh a hungna te a siam a, tuipui lamah pawh daidanna siamin, radar systems, command leh control room-te siam a nih tur thu kum 2016 khan a sawilang a ni.

Israel defence minister Benny Gantz chuan a ministry thuchhuahah, lei hnuaia daidanna bang siam chu khawl tunlai leh changkang taka thuam a nih thu a sawi. Leihnuai bang siam hi km 65-a thui a ni a; camera, radar leh khawl dang eng za chuang zet dah a ni a, bang siamna atan hian iron leh steel ton 1,40,000 a hmang a ni. Lei chung lama bang an siam pawh feet 20-a sang niin, tuipui lamah pawh an siam a, hei bakah hian dan kalha an ram tuipui china luh ruk tumte hriat theihna tur hmanrute an dah tel bawk.

Gaza Strip hian Egypt nena inrina, km 14-a thui a nei tel bawk a, ramri kaltlanga Hamas-ten ruihhlo tawlhrukna tura lei verh an siam pawh kum 2013 aṭang khan Egypt sipaite chuan a lo tichhe fo tawh a ni.