Kum 1799 inbeihnaa Napoleon-a ngunhnam ken $mtd 2.8 in hralh

Napoleon Bonaparte-a'n kum 1799-a sorkar paihthlak tuma a beihnaa ngunhnam hman leh ralthuam dang panga-te chu US-a lilamnaah USD maktaduai 2.8 in an hralh tih US auctioneer-te chuan Thawhlehni khan an puang.

Illinois-a hmunpui nei Rock Island Auction Company chuan December 3 khan virtual hmangin an lilam a, phone hmanga an lilam chhangtu hnenah an hralh tih thu leh, a leitu nihna hi tarlan a nih loh thu company president Kevin Hogan chuan a sawi.

Ngunhmam leh pistol panga-te hlut zawng hi USD mtd 1.5 - 3.5 inkar nia chhut a ni.

"USD mtd 2.87-a an hralh tak Napoleon Garniture leitu hian khawvela thil hlu tak a hawn dawn a ni," tiin Hogan chuan a sawi. Ngunhnam hi collection zinga an ngaihhlut ber a nih thu auctioneer-te chuan an sawi.

He ngunhnam hi Versailles-a state arms factory director Nicolas-Noel Boutet kutchhuak a ni.

Emperor-a dah a nih hnuah, Napoleon khan a nguhhnam hi general Jean-Andoche Junot hnenah a pe nia hriat a ni. Mahse leiba rulhna atan general nupui hian he ngunhnam hi a hralh a ni.

Hemi hnu hian London museum-ah hmuhchhuah leh a ni a, a neitu hnuhnung ber hi US mi, thil hlu lakhawmtu ṭhin a ni a, tun hnaiah a thihsan avangin hralh chhuah a nih tak thu auction house chuan a sawi.

May thla khan France chuan Napoleon a thih cham kum 200-na an lawm a ni.