UAE-in kar khat chhunga hnathawh hun titawi

United Arab Emirates (UAE) sorkar chuan January 1, 2022 aṭanga hman ṭan turin kar khat chhunga hnathawh hun chu ni li leh a chanve-ah a titawi.

Sorkarin working hours siam thar hi sorkar hnuaia department leh pawl hrang hrangten an hmang dawn a ni. He dan siam tharah hian working hours chu Thawhṭanni aṭanga Nignani thlengin zing dar 7:30 aṭanga tlai dar 3:30 thleng a ni ang a, Zirtawpniah zing dar 7:30 aṭanga chhun dar 12 thleng a ni ang.

Muslim ram an nih anga Zirtawpnia sermon leh ṭawngṭaina hun hman ṭhin chu chawhnu dar 1:15 aṭangin neih ṭan ṭhin a ni ang. Inrinni leh Pathianni chu chawlh a ni dawn thung a ni.

Khawvel ram pumah kar khat chhunga hnathawh hun hi ni nga a ni tlangpui a, UAE hi hnathawh hun titawi hmasa ber a ni. Hnathawh hun bi siamthar hi sorkar hnuaia mite zawm tir tih ni mah se, private industry leh school-te pawhin an zawm ve nghal rin a ni.

Thuchhuah a siamah, sorkar chuan kartawp chawlh an pawhsei chhan hi work-life balance ṭha zawk leh, khawtlang nun nuam zawk siamna tura sorkarin hma alakna peng pakhat a ni tih a sawi.