Germany Chancellor thar atan Scholz thlan a ni

Kum 16 chhung zet Germany ram hruaitu dinhmun lo chelh tawh, Angela Merkel thlakin nimin aṭang khan Olaf Scholz chu Germany Chancellor thar a ni ta. Indopui II-na hnua Germany Chancellor pakuana a ni.

Kum 63 mi, Scholz hian kum 2018 aṭang khan Merkel-i hnuaiah vice chancellor leh finance minister dinhmunte a lo chelh tawh a, kum 2002-2004 chhung khan SPd party secretary general a lo ni tawh bawk.

Olaf Scholz kaihhruai Social Democrats hi Septem­ber thlaa an ram inthlanpuiah khan thlan tlin niin, party mala sorkarna an siam theih loh avangin Greens leh Free Democrats (FDP)-te nen ṭangrual sorkar an siam dawn a ni. Party pathumte hian an thawhhona tur hi Thawhlehni khan an ziak fel a ni.

Nimin khan Germany Parliament lower house, Bundestag-ah Chancellor atan hian thlan a ni a, a thlawp lamah vote 395 tlain, a thlawp lo lamah vote 303 tlain, member paruk an hai thung.

Chancellor atana thlan a nih hnuah, Schloz hian President palace pan nghalin, Germany President Frank-Walter Steinmeier chuan Chancellor atana ruat a nihna official document a lo pe a, hemi hnu hian parliament lamah a cabinet member atana a thlante nen an let leh a ni. Scholz hian cabinet member atan mi 16 a ruat a, SPD aṭangin mi pasarih, Greens aṭangin mi panga leh FDP aṭangin pali a ruat.