Nigeria-ah Covid vaccine dose mtd 1 chuang tichhia

Africa ram hrang hrangah Covid-19 vaccine indaih lohna a nasat hle laiin, Nigeria ramah chuan November thla khan vaccine dose maktaduai khat hman lohin an tichhe hman nia sawi a ni.

Africa rama mihring tamna ram, Nigeria ramah mi maktaduai 200 chuang an cheng a ni. World Health Organisation (WHO) in a tarlan danin, Nigeria rama puitling zingah vaccine dose kima la hi 4% chauh an la awm.

Covid-19 vaccine an tihchhiat hi AstraZeneca (AZN.L) siam a ni a, Europe aṭangin COVAX programme kaltlanga thawn an ni. Mahse vaccine-te hi an dam chen a rei lo a, a dahṭhatna mumal tak a awm a ngai bawk a, hetih lai hian ram rethei zawkah chuan a dahṭhatna hi an nei ṭha tawk lo nia sawi a ni.

Nigeria rama vaccine thawnte pawh hi expiry date thlen hma kar 4-6 vel chauh a awm tawh tihin an thleng a, hei vang hian health thuneitute lamin theihtawp an chhuah chungin an vaccine dawn zawng zawng hi a hman theih chhungin an semchhuak zo hman lo a ni.

WHO chuan hemi chungchanga zawhna a chhannah, immunization programme dangah pawh vaccine thi tawh leh, tihchhiat hi a thleng fo tih sawiin, vaccine thih hnaih tawh dawna thawnchhuah a ni ṭhin chuan harsatna a thlen fo tih a sawi.

Europe ramah pawh vaccine tihchhiat hi a thleng fo a, Germany, Switzerland, Britain leh France pawhin vaccine eng emaw zat an tichhe hman a ni.