Thailand football team-te damdawiin aṭangin chhuak

Thailand-a Tham Luang puk aṭanga chhanchhuah, Wild Boars football team-a rawlthar 12 leh an coach-te chu nimin khan damdawi-in aṭangin chhuah tir an ni.

Thailand sorkar thupuangtu Sunsern Kaewkumnerd chuan football team-te hi damdawi-in aṭang hian Ningani-ah chhuahtir an ni dawn tih lo sawi tawh mah se, ruahman lawk aiin ni khatin chhuah tir hma an ni ta zawk tih a sawi. Damdawi-in aṭanga chhuah an nih hnu, in lam an pan hmain media miten an kawm nghal bawk a ni.

Kaewkumnerd chuan puk-a tang, rawlthar leh an coach te chanchin hi khawvelin a ngaihven a, hei van hian a hnu zelah media lamin an umzui buai lohna turin press conference an buatsaihsak tih a sawi. Press conference hi Chiang Rai provincial hall-ah minute 45 chhung neih a ni a, an rama television channel lianahte tihchhuah a ni. Journalist-te zawhna hi a hmain Chiang Rai province-a public relations department chuan lo lakhawmin a enfiah hmasa phawt a ni.

Doctor-te chuan rawlthar, kum 11-16 inkarte hi in lamah an hawn hnuah media mite chimbuai tir lo turin an chhungte an ngen a, thla khat tal chu media mite hmachhawn tir lo a, nunphung pangngai an zawh leh theihna tura veng turin an ngen.

Rawltharte leh an coach hi an taksa pawh a chak ṭha tawh nia sawi a ni a, mahse media lamin an umzui a, zawhna hrang hrangte an zawh reng chuan an rilru lamah nghawng a neih a hlauhthawnawm niin health official-te chuan an sawi.

Tham Luang puk aṭanga football team leh an coach te chhanchhuah an nih dan documentary, Operation Thai Cave Rescue tih chu July 20 hian Discovery Channel-ah tihchhuah a ni dawn. He documentary-ah hian puk-a tuilian avanga tang, Thailand football team leh an coach-te chhanchhuah an nih dan hautak chu a lema lantir a ni dawn a, he documentry hi ITN Production nena an siam a ni. July 20 zanah Discovery Channel, Discovery HD World, Discovery Turbo leh Discovery Science-ahte tihchhuah a ni ang.