Donald Trump-an North Korea nuclear tihtawp hun bithliah awm lo tih a sawi

US President Donald Trump chuan North Korea nuclear ralthuam tihtawp tura an phutnaah hun bithliah a awm lo a, hmanhmawh taka kalpui pawh a ngai lo niin a sawi.

President Trump-a a hmain NKorea nuclear ralthuam tihchhiat hna chu rang taka kalpui a nih tur thu a lo sawi tawh a, mahse tun ṭumah hian a thusawi dan hi a thlak leh a ni.

June thlaa Singapore-a US president leh NKorea ram hotu Kim Jong-un ten meeting an neihah khan Korean peninsula aṭanga nuclear ralthuam tihbo an lo rel dun tawh a ni. Trump chuan NKorea nena an inbiakna chuan hma a sawn zel tih sawiin, hun bithliah siam a ni lo, a ti. NKorea aiawhte nena inbiakna neih chhunzawm zel niin, boruak pawh a ṭha hle tih a sawi. Hetih lai hian NKorea ram hrekna erawh hman chhunzawm a la nih thu a sawi.