European Union leh Japan-in free trade deal siam

European Union leh Japan chuan khawvela free trade deal lian ber zinga mi tur an siam a, he inremna siam hian khawvel GDP hmun thuma ṭhena hmun khat leh mi maktaduai 600 vel a huam thei dawn a ni.

EU-in Japan rama a thawnluh tam ber chu dairy goods a ni a, hetihlai hian Japan-in a thawnchhuah tam ber zingah hian car a tel thung.

Insumdawn tawnna lama inremna lian tak an siam thei chu EU leh Japan tan thil ṭha ve ve a nih thu EU Commission hotu Jean-Claude Juncker chuan a sawi. Inremna an siam thei chu an beisei phak bak a ni tih sawiin, hemi hmang hian insumdawn tawnna felfai leh zalen tak an kalpui thei dawn tih a sawi. Insumdawn tawnna chu chhiah inlaksak leh indaidanna siam lam ringawt a ni lo a, an vaia hlawkna an neih theihna tur kawng ngaihtuah a, inrintawnna leh thuthlung nghet tak neihna a pawimawh thu a sawi. Hei hi US sorkarin an rama ramdang bungrua thawnlutte laka chhiah a tihsan chungchang a sawi elna nia ngaih a ni.

Thla 18 kalta han US chuan Japan leh Asia ram dangte chu free-trade agreement, Trans-Pacific trade agreement siam dan ngaihtuahin inbiakna a neihpui a, mahse Donald Trump-a president a nih hnu khan he inbiakna aṭang hian a inhnukdawk a ni. Hemi hnu hian Trump hian a policy, 'America First' kalpuina tur Japan leh EU-in US-a bungrua an thawnlut eng emaw zatah chhiah a tisang a ni.