Israel PM-in Gaza Division headquarters a tlawh

Israel Prime Minister Benjamin Netanyahu chuan Thawhlehni khan Israel sipaite Gaza Division Headquarters a tlawh.

Tun hnaiah Gaza leh Israel inri-na bulah hian Palestinian mi nawrh huaihawt leh Israel sipaite inkarah buaina a chhuak a fo a, buaina a thlen reng karah Israel PM hian sipaite hmun hi a tlawh a ni. PM office chuan Netanyahu hian Israel leh Gaza inrina bulah security dinhmunte a enfiah nghal niin a tarlang.

PM Netanyahu chuan buaina nasa zawk chhuah palh thuta Israel sipaite inbuatsaihna chu a fak thu sawiin, amah ang bawkin Israel mipuite chuan Israel Defence Force te chu an ringtawk a, an hmalaknaah pawh an thlawp tlat dawn tih a sawi.

Kar kalta Zirtawpni leh Inrinni khan Israle sipaite hian Gaza Strip-ah beihpui thlakin, Hamas ho hmun an bei a, mi pahnih an thi. Hetih lai hian Gaza aṭangin Palestinian firfiakte chuan Israel chhim lam chu mortar shell leh rocket in an kap ve bawk a, mi paliin hliam an tuar a ni.

Inrinni zan khan Hamas-te chuan inkahhai an puang thu an sawi a, mahse a tuk Pathianni-ah lehkhachaih leh balloon halte chu Israel ramah an chhuah zui leh a, hei hian thlai chinna ram km 34 bial vel a kang chhia a ni.

Hamas chuan Gaza aṭanga Israel rama balloon halsa chhuah ṭhin tihtawp tir vek tur chuan hun eng emaw chen a la ngai dawn niin an sawi. Mahse Netanyahu chuan balloon leh lehkhachaih emaw, thil dang emaw hmanga Israel beihna chu eng kawng mahin an remti dawn lo tih sawiin, balloon chhuah ṭhinte pawh sipaiten an beih let zel tur thu a sawi.