China Parliament-in Hong Kong national security law pawm
China Parliament chuan nimin khan sawisel hlawh tak Hong Kong national security law chu a pawm a, he law hi vawiin aṭanga hman ṭan tura tih a ni.
He dan thar hi nimin zing dar 9 khan National People`s Congress Standing Committee member 162 te chuan minute 15 chhung lekin an pawm a, dan bawhchhiate chu 10 thleng jail tantir theih an ni ang.
Security law thar hi vawiin aṭanga hman tur a nih rual hian Hong Kong chu British lak ata zalenna a hmuh kum 23-na puala hman theih tura duan a ni. He dan thar tur hnuaiah hian Hong Kong aṭanga tlanchhuah phal a ni dawn lo a, ramdang sipaite inrawlh phal a ni dawn lo bawk. Hei bakah hian sorkar laka helna leh sorkar laka hel tura infuihpawrhna lam phal a ni dawn lo bawk a ni.
Hong Kong mipuite chuan dan thar siam tum hi an mimal zalenna rahbeh sakna tur a ni tiin, duh lohna hi vawi tam tak an lantir tawh a, Pathianni pawh khan he dan duh lohna kawngzawh (silent march) an nei a, hemi ṭum hian police-te chuan mi 53 an man.
June 18 khan G7-a foreign minister-te chuan dan thar duh loh chungchangah thuchhuah inṭawm an siam tawh a ni. June 23 khan European Parliament pawhin Hong Kong-a security law thar hman tum hi International Court of Justice (ICJ)-ah ngaihtuah phawt nise tiin vote hmangin ngaihdan a la bawk. US president Donald Trump chuan he dan thar hi a duh loh thu a sawi bawk a, Australia, UK leh ram dangte pawn security law thar hi an
sawisel a ni.