Turkey-in state of emergency a titawp

Turkey sorkar chuan kum hnih liam taa sorkar paihthlak tuma beih a nih vanga ram puma emergency a puan chu Nilaini khan a titawp ta.

State of emergency puan a nih hnu hian sorkar paihthlak tumnaa inhnamhnawiha puh mi sing tel man an nih bakah, mi tam tak an hna aṭangin ban an ni bawk. Emergency hi thla thum atana puan a ni a, mahse a hun a tawp hnuah pawh sorkarin a pawtsei zel a, ṭum sarih zet pawhsei a ni.

Turkey President thlanna neih zawh takah khan candidate hrang hrangte chuan an rama emergency puan tihtawp hi an tiam hlawm a ni.

Kum 2016, July 15 khan sipai ṭhenkhat ten President Recep Tayyip Erdogan-a kaihhruai sorkar paihthlak tuma an beihnaah hian mi 250 chuangin nunna an chan a ni. Turkey sorkar chuan sorkar beihnaa mawhphurtu berah US-a tlanchhe mek, Islamic hruaitu Fethullah Gulen chu a puh. Gullen-a nena inzawmna neia puh leh, sorkar paihthlak tuma beihna thlawptua puh mi 107,000 chu an hna aṭangin hrem an ni tawh a, mi 50,000 chuang chu man niin thubuai siamsak an ni bawk.

Turkey sorkar chuan emergency hi hlih ni mah se an rama democracy tihchhiat tumtute chu a bei chhunzawm zel dawn tih a sawi. Sorkar chuan kum thum chhung atana hman tur security law draft chu Parliament-ah a thehlut tawh a, karleh hian an pawm hman beisei a ni.

He dan thar siamah hian sorkar rorelna tibuai zawnga che a rinhlelhte hremna pe turin local governor te chu thuneihna sang zawk pek tum an ni. He dan hmang hian Turkey sorkar chuan kum thum chhung chu sorkar hnathawk, firfiaka chetna thlawp leh inhnamhnawiha puhte chu a ban thei dawn a ni. Hei bakah hian nawrh huaihawt khapna pawh telh a ni bawk.

Justice Minister Abdulhamit Gul chuan emergency hlih ni mah se, firfiakte a bikin Fethullahist Terrorist Organization (FETO) beihlet hna chu chhunzawm zel a ni dawn tih a sawi. A ṭul a nih chuan emergency pawh chu hman chhunzawm leh a ni mai dawn tih sorkarin a sawi.