Nawaz Sharif-a enkawlna ṭha tak pek a ni : Pakistan

Pakistan sorkar chuan eiruk thubuaia thiam loh chantir vanga jail-a tang mek, an ram prime minister hlui Nawaz Sharif-a leh a fanu Maryam-te chu jail-ah enkawlna ṭha tak pek an nih thu a sawi.

Pakistan Muslim League–Nawaz (PML-N) hruaitu Nawaz Sharif leh a fanu hi kar kalta Zirtawpni zan khan London aṭangin Lahore an pan a, Lahore airport-ah man nghal a ni. Airport aṭang hian Rawalpindi-a Adiala jail-ah hruai an ni.

Nawaz Sharif leh a fanu Maryam te hi Avenfield Reference case-ah thiam loh chantir an ni a, eiruk leh thuneihna dik lo taka hmanga puh an ni. Sharif-a hi London-a in pali a neih avangin eirua puh a ni a, a hnathawh leh a sum lakluh inmil loa puhnaah kum 10 tang tura hrem a ni a, a fanu pawh hi he thilah hian inhnamhnawiha puh niin kum riat tang tura hrem a ni bawk.

Sharif-a party, PML-N chuan jail chhunga Nawaz Sharif-a enkawl a nih dan chu a lungawi thlak lo hle niin an sawi a, enkawl leh hmanraw ṭha pek a ni lo a, khum pawh nei loin chhuatah a mu niin an sawi.

Mahse Punjab Information Minister Ahmed chuan media hnenah Sharif-a hi enkawlna ṭha tak pek a nih thu a sawi a, jail chhunga Better Class portion-ah cell hranah dah in, steel khum, chair, newspaper te bakah a khum phah tur puan hran te, thawmnaw inthlakna tur, ceiling fan, bracket fan pahnih leh inthiarna hmanruate pawh pek vek a nih bakah, TV inches 21-a lian pawh dahsak a ni, a ti.