Kum khat chhunga Journalist man tam ber ṭum thleng ; Kum 2021 chhungin journalist 24 thah an ni tawh

Kum 2021 hi khawvel huapa Journalist man tam ber ṭum a ni tih Committee to Protect Journalists(CPJ) chuan a tarlang a, December 1 thleng khan ram hrang hrangah journalist 293 man an ni tawh.

Chanchinthar an tihchhuah kaihhnawihah journalist 24 chu kuminah thah an ni tawh a, midang 18 pawh an hnathawh kaihhnawihah an thi tawh bawk.

Ram hrang hranga journalist mante an man chhana in ang lo hlawm a, hemi rual hian man zinga a tam zawk chu politics kaihhnawih thil leh, independent reporting ngaihtheih lohna lian chho zel vang nia a lan thu US-base CPJ hian a sawi.

CPJ executive director Joel Somon chuan, CJP hian kum ruk chhung chu ram hrang hranga journalist man tawkte a chhinchhiah tawh tih sawiin, man tawk an pun chhoh zel aṭang hian sorkarte chuan thuthar thehdarh kawngah journalist-te thunun a tum chho zel a, sorkarte hian hma an laknaah zahpah an nei lo chho zel tih a lang niin a sawi.

Kumina journalist thah zingah hian Reuters photographer, July thlaa Afghanistan-a Taliban-ten an beihnaa thi Danish Siddiqui leh, June thlaa Mexico rama kahhlum Gustavo Sanchez Cabrere te pawh an tel.

China chu kumin chhunga journalist man hnem ber ram niin, mi 50 a man tawh. Kum thum chhung chu a zawnin journalist man tawk tamna ber ram a ni tawh a ni. Myanmar-in dawtin journalist 26 in man an tawk a, heng mite hi February 1-a sipaite civil sorkar thuneihna an hnehchhuh chungchang report vanga mante an ni ber. Egypt-ah mi 25, Vietnam-ah 23 leh Belarus-ah journalist 19 chu kuminah man an ni tawh tih CPJ chuan a sawi.