US Senate-in Joe Biden-a thupek dan sak

US Senate chuan President Joe Biden-an private company liana hnathawkte Covid vaccine lak emaw, test emaw kalpui ngei ngeina tur thupek a siam chu Nilaini khan an dan sak.

President thupek siam chungchang hi Nilaini khan Senate-ah ngaihtuahin vote lak a ni a, he thupek dansak duhtu lamah vote 52 tlain, President hmalakna thlawp lamah vote 48 a tla thung. Senate-a Republican member awm zawng zawng 50-te chuan President hmalakna thlawp lo lamah vote-in, Democrats member pahnihin an vote pui bawk a ni. Mahse House of Representative-a ngaihtuah a nih hunah erawh chuan Republican lam chauhin an thlawp rin a ni thung.

President Biden-a ruahmanna hnuaiah hian nakkum January 4 aṭangin company-a thawktu 100 chuang awmnate chuan, an hnathawkte vaccine an laktir loh chuan kartin test neihtir ziah tura tih a ni. He dan hi an zawm loh chuan company-te chuan dan an bawhchhiatna pakhatah USD 13,000 zel chawi tura tih an ni bawk.

Mahse Republican lam chuan he ruahmanna hi ṭha an ti lo tih sawiin, vaccine lak chu thlawp vek mah se sorkarin thupek anga a tichhuak chu a ti mah mah niin an sawi. Senate Republicans chairman John Barrasso chuan President Biden chu doctor a ni lo a, damdawi hman dan kalpui dik loah a puh. Republican senator Mike Braun pawhin hnathawktute dinhmun tiderthawngah sorkar a puh a, hna siamtu mi tam takin he ruahmanna hi an sawisel a, hei vang hian US Senate pawhin President hnenah he ngaihdan ṭha lo tak hi sut turin kan hrilh duh a ni, a ti.

Vote lak hnuah Democrats senator zinga Republican lam vote puitu pahnih zinga pakhat, Joe Manchin chuan sorkar hnathawk leh sipaite tana vaccine lak ngei ngeina tur dan siam chu thlawp mah se, sorkar chu private sumdawnnaa inrawlh tur a ni lo, a ti. Sorkar lam chuan private company-te chu nawr lui loa, an hnathawkte vaccine la tura fuiha chawkphur zawk tur a nih thu a sawi bawk.