Myanmar-ah mipuiten 'silent strike' nei

Myamnar-ah nimin khan sipai rorelna duh lohna lantirin 'silent strike' neih a ni a, sumdawnna hmun leh dawrte khar a nih bakah, mipuite pawh pawn an chhuak lo bawk.

Myanmar media-te chuan an ram chhung khawpui hrang hrangah dawr khar vek an nih bakah, kawtthlerte pawh a reh hle tih an sawi Hmarlamah Shwebo khuaah erawh chuan mipuiten thawmhnaw thum inbelin ngawi rengin kawng an zawh. Khawvel hriatah Myanmar rama mihring dikna chanvo nasa taka palzut a nih dan chu an hriattir a ngai tih sawiin, ngawi renga lantir chuan thawm lian tak a nei thei a ni tih kawngzawhnaa an hruaitu Khin Sandar chuan a sawi. "Kan chanvo min pek kan duh a, sorkar thlak an duh a ni. Kan pasalṭha tam tak an thih avangin pawi kan ti takzet," tiin a sawi.

Silent strike buatsaih tum a nih thu an hriat hian sipaite chuan Magwe Region-a dawrkaite chu nimin khan an dawr hawng vek turin an vau a ni. Hei bakah Aung San Suu Kyi-i party, National League for Democracy (NLD) hmingin social media lamah fake statement tihchhuah a ni bawk a, mipuite chu silent strike hi zawm lo turin an ngen. Mahse mipuite chuan he thuchhuah hi a lem tih an hriat thu sawiin, sipaite nena inzawmna nei social media account aṭanga thehdarh a ni, an ti.